Salutvorto de la redaktoro:
Post kelkaj monatoj laboranta kune kun teamo de
diversaj personoj el multaj landoj estas ĝojo prezenti al vi, kara
leganto, la unuan eldonon de la internacilingva scienca revuo
Teleskopo.
Ĉar ni vivas dum malfacilaj tempoj kiuj tro
rapide fluadas, sendube dankindaj estas ĉiuj kiuj senĉesi helpis
min aperigi ĝustatempe la revuon. Mi volas danki speciale al
Doktoro Rüdiger Sachs, kiu sugestis al mi meti subnomon por
klarigi pri kio temas la Revuo Teleskopo; Doktoro Christer
Kiselman, kiu multege helpis min kritikante la laboron, sugestante
laŭ siaj antaŭaj spertoj diversajn aferojn kaj atentigante min pri
la neceso de la scienca kaj lingva kvalito; ankaŭ Doktoro Rudolf
Fischer, kiu bonkore opiniis pri diversaj nuancoj en Esperantujo
kaj ĉiam pretas helpi pri gramatiko kaj lingvaj duboj. Sciu vi
ĉiuj, kiuj kontribuis laŭ viaj kapabloj por aperigi la revuon ke
pro vi Teleskopo eblas kaj pretas.
En tiu ĉi unua eldono Teleskopo enhavas kvin
artikolojn. En la unua artikolo la brazila doktoriĝanta entomologo
Wendel J. Teles Pontes provas elmontri la plej evidentajn
karakterizojn de du kopulaci-sistemoj (poliandrio kaj monandrio)
en Lepidoptera kaj komenti la morfologiajn kaj fiziologiajn
adaptiĝojn de maskloj kaj femaloj en ambaŭ; Due, Dr. biol. Nikolao
Gudskov de la Supera Lernejo pri Psikologio de Moskvo, Rusujo,
prezentas seriozan artikolon kiu estas parto de liaj studoj kaj verkata
libro pri kiel la homo ekis pensi. Li demandas ĉu Taleso estis la
unua filozofo aŭ ĉu estis iu forgesita "Sepo"; poste, Dr. Roberto da Silva
Ribeiro de la Brazila Nacia Historia kaj Arta Instituto (IPHAN),
arkeologie artikolas por priskribi tri splitajn ŝtonaj iloj tipaj
ie brazilaj pra-indiĝenaj kulturoj eltrovitaj en Valo de Rivero
Cotinguiba, Sergipe, Brazilo; Legu ankaŭ la verkon
de Dr. Věra
Barandovská-Frank
de la Instituto pri Kibernetiko de
Paderborn, Germanujo. Laŭ ŝia opinio, planlingvoj en
sciencoj estas realisma fenomeno, do ŝi intencas
doni respondon al la sekvonta
demando: "Kiel planlingvoj povas helpi la
sciencon?"; konklude, la unua eldono de la revuo Teleskopo enhavas
verkon de la filozofo kaj emerita profesoro de la Sud-Ilinojsa
Universitato en Edwardsville, Usono, Ronald J. Glossop, kiu volas
atentigi vin, pere de sia artikolo "La signifo de la Dudek-Unua
Jarcento", antaŭe prezentita kiel prelego en la Aŭtuna
Esperanto-Rekontiĝo de Novjorko, pri kulturaj ŝanĝoj kiuj iom
post iom okazadas en tri kampoj: 1) Ni nun ekpensas pri ni mem
kiel civitanoj de la tuta mondo, ne nur de unu nacio; 2) Ni nun
ekkonstatas ke ni bezonas nenacian tutteran lingvon kiun ĉiuj
membroj de la tutmonda komunumo povas uzi por komuniki unu kun la
alia; 3) Ni nun ekkonstatas ke nia ĉefa lojaleco devas esti al
demokratia tuttera registaro dum la lojaleco al nia landa
registaro devas esti sub tio.
Vi sukcesos elŝuti ĉiujn artikolojn ĉu aparte
pere de rekta elŝultoligilo kiu aperigos nur la artikolon elektitan de vi ĉu pere de elŝutoligilo kiu aperigos al vi kune la
tutan enhavon de la unua eldono de la internacilingva scienca
revuo Teleskopo. Mi esperas ke vi ĝuos la legadon.
Salutas vin,
Dominique Vieira.
